Open-IIT Prempatra

Naye din ki khaatir me lage hain log, main to gujra hua saal hoon.......

Tum kar lo accept to meharbaani tumhari, main to rejected maal hoon...

Kuchh hunar hi nahi

ki is aasmaan me chamak jaaun

guitar ke taaron se apni patati nahi

aur dhairya kahan jo seekh paaun

gala aisa besura kambakht ki

gaa doon to pit jaaun

koi drum to koi synth

god-like bajaata hai

bajaane ke naam par

main bas kar pata kartaal hoon

log shankar ki dhun pe machalte hain,

main to euphoria waala Taal hoon…

tum kar lo accept to meharbaani tumhari, main to rejected maal hoon...

Padhne ka kissa aisa ki

bas IIT aane ke liye padha tha

‘Ek baar nikal jaaye fir aish’

yahi soch inorganic rata tha

electrical aur programming ne

aisa palatwaar kiya ki

mugne se yaari chhut gayi

aur ab aalam ye hai ki gujarta minute

bhi kahta hai- ‘main saal hoon!’

poochh bas nahli, atthi ki yahan

main to chhaggi behaal hoon…

tum kar lo accept to meharbaani tumhari, main to rejected maal hoon...

Hall ke maai-baap ke funde

mujhe start se bakwaas lage

aur hum tempo waale kaamo.n

me shuru se darkinaar rahe

Gymkhana ke jo bhi armaan jage

hall waalo.n ne kaat liye

apni bhalayi dekh hum bhi

is mainstream se bhaag liye

jaise taise zindagi kati

aur ab budhha, paanchwa saal hoon

hall, gymkhana ke bade bade god yahan

main to 2^nd year se hi be-hall hoon..

tum kar lo accept to meharbaani tumhari, main to rejected maal hoon...

Sach maano to mujhe

ye duniya jhoothi lagti hai

apne matlab saadhne me lagi

ye bheed pakhandi lagti hai

hunar bas itna sa hai

ki jab aankho.n me aansu honge

tumhaari muskaan ban sakta hoon

aage-peechhe tumhaare mandara nahi sakta

par jaan lo ye tum ki

jab aanch aayegi tumpe

to ye bheed kat legi…

faulaad ki tarah ad jaayegi jo

main wahi dhaal hoon

tum kar lo accept to meharbaani tumhari, main to rejected maal hoon...